MellinMellot_BnF-1630.txt

Au temps que rois Artus estoit,
cilz vilains an un bois estoit,
morans de fain, deschaus et nus ; 
seur un povre asne estoit venus
un po de buiche soiche querre, 
que si anfant moroiẹnt sus terre
de froit, de fain et de meschief. 
Li vilains fu a telz meschief :
la pluiẹ, la gelee et le vant
li feroient ou vis devant. 
Ploroit et fort se guermantoit
por la grant dolor que santoit. 
Son asne ne pouoit chargier
ne n’avoit mestier de targier, 
que li sien anfant a l’osté
avoient ansinc grant lasté.

Mellins par iqui reparoit 
et vit le vilain qui ploroit.
Au cuer l’an print mont grant pitié.
Vers lui va, si li a aidié 
jusque son asne pot chargier 
et puis li a dit sanz tangier :
« Va t’an, preudon, Dieux t’aidera, 
et bien briemant et tost sera :
dedans tier jor t’aparcevras. 
D’ui an .viii jors ci revanras ; 
Mellin huichë et ge vandrai 
et a ta besoigne antandrai
si que bien t’an pourras parsoivre. » 
A tant li vilains se desoivre ;
d’aler chiez lui si s’an hasti, 
et Mellins li ot ja basti 
de blef plaines deus cherretees
dou seigneur dou leu lui donnees,
que preudome et povre le vit.
Quant li bons hon cest eür vit,
pansa que Mellins a dit voir. 
Molt est or plains de grant savoir !
Lors li vilains fist le blef cuire,
mes des mois n’a paour qu’il muire.
Au chief dẹviii. jors ou bois revint,
bonnemant et maz se maintint. 
A cel propre leu s’atuicha
et monseingneur Mellin huicha. 
Mellin devant lui a vehu 
qui dist : « Conmant t’est puis ehu ?
- Monseigneur, bien, par vostre afaire.
- Va t’an, or pance dou bien faire,
ancor te donrai autre bien,
et d’ui enviii. jors ci revien. »
D’aler chiez lui tost se pourvoit. 
Trouva que ses sires avoit
grans garnisons chiez li menees, 
robes toutes faites donnees ; 
n’i a nul d’eus qui robe n’oit
et qui a grant honneur ne soit. 
Deniers et blez et bestes orent
et se que il demander sorent.
A dont ou bois s’an retourna, 
tout droit an son androit torna ; 
a sa voiz huiche et a haut cri :
« Mellin, vien avant, ge te pri ! »
Lors Mellins pres de lui c’est mis.
« Conmant t’est il, dist il, amis ?
- Mellin, il m’est bien orandroit.
- Or t’an retourne arrier tout droit. 
Ancor a plus grant bien tandras
et d’ui an huit jors revandras. »
Cilz s’an tourne plus tost que pot.
Trouva ses sires mandé l’ot, 
gardë et gouverneur l’ot fait
de sa terre et de tout son fait.
Sires fu aprés le seigneur,
de touz les autres fu greigneur. 
A grant poines ou bois revint ;
toutevoiẹ son chemin i tint.
Quant il i fu, plus haut que pot, 
a voiz haute a huichié : « Mellot !
Se tu viax, vien, se tu viax, lai.
Lequel que tu vorras, si fai.
Plus ne t’atandrai, ge m’an vois ! »
A tant Mellin ist hors do bois.
Si tost com li vilains le vit, 
si li dist si com par despit :
« Mellot, tu te fais trop huichier !
Ge n’ai plus a ci venir chier. 
- Or t’an va et plus n’i revien ! 
Miaux que tu pourras te maintien ! »
Lors c’est cil chiez lui adrecié. 
Son seigneur trouva courrecié : 
tout quanque il a li ot osté ; 
n’i demoura en son ostel
ne robe ne nul garnemant,
se moins non qu’il avoit devant,
fors tant c’un asne qu’i avoit,
qu’ailleurs ou tourner ne savoit.
Tout nu le print, tout nu le lesse ! 
Or peut mener son asne en lesse ! 
Arrier va li vilains au bois
seur son asne a petit degois.
« Monseigneur Mellin ! » souvant crie.
Assez le huiche, assez le crie,
mes nulz respondre ne li pot. 
« Sire Melin ! Mellin ! Mellot ! »
Or sot il bien que se vost dire.
Or est retournez en l’anpire. 
Honiz soit qui vilain fait grace 
ne qui aime lui ne sa trace !