ConBesche_BnF-837.txt 2.68 KiB
Du con qui fu fait a la besche
Adans, que Nostre Sires fist,
qui puis vers lui tant se mesfist
qu’il passa son commandement
- se l’Escripture ne nous ment,
ce fu par le mors de la pomme -
de la terre forma Diex l’omme,
puis si en prist uene des costes
qu’il li ot au costé apostes,
onques n’en prist ne plus ne mains,
si en fist fame a ses .ii. mains.
Por ce sueffre fame tant cops
que Nostre Sires le fist d’os.
Qui acoustume fame a batre
.ii. foiz le jor ou .iii. ou .iiii.,
au premier jor de la semaine,
.x. foiz ou .xii. la quinsaine,
ou ele jeünast ou non,
ele n’en vaudroit se miex non.
Fame ot biau col et biau vïaire.
Con i oublia Diex a faire
qu’il ne s’en estoit donez garde.
Li maufez i vint et l’esgarde.
.I. petit s’abesse et encline,
et vit au tiers neu de l’eschine
qu’il n’i avoit c’un seul pertuis.
A Dieu vint et se li dist puis :
« Sire, mal avez esploitié.
A fame faut bien la moitié !
Fetes tost et tornez arriere,
et metez ou quartier derriere
la chose qui miex i besoingne,
quar ne vaudroit une eschaloingne
fame, s’ele n’avoit tesniere
mise pres de la creponiere !
- Hé, dist Diex, je n’i puis entendre.
De ce te covient garde prendre. »
Dist deables : « Et je comment ?
- Je le te di tout vraiement
que tu orendroit le feras,
que rien du tien n’i meteras
ne n’en osteras nient du mien. »
Dist li maufez : « Jel ferai bien ! »
Dont prist li deables martiaus
et doleoires et cisiaus,
besches trenchanz et besagües,
et granz coingnies esmolues,
et regarda selon son chiex
li quels des feremenz vaut miex
a l’uevre fere q’ot empris,
et dist ja n’i sera repris
que il n’i face une grant roie,
quar d’autrui cuir large corroie !
Trestoz les feremenz esgarde
.i. a un, que point ne s’i tarde,
et quant il a trestout veü,
si a molt bien aperceü
que la besche est assez trenchant,
s’en puet on fere maintenant
une grande fosse et parfonde.
Il dist qu’il n’a si bone el monde.
La besche prent et si s’afiche ;
toute enz jusqu’au manche la fiche.
Ainsi fist le con a la besche.
Vers la fame .i. petit s’abesse.
.I. pet li a fet sor la langue.
Por ce a fame tant de jangle,
por ce borde ele et jengle tant.
Et quant li pes li vint devant,
ele le cuida geter hors,mes le pet li remest ou cors,
que li deables i lessa
quant sus la fame s’abessa.
Por ce le doit l’en molt soufrir.
De parler ne se puet tenir,
se n’est par amors ou par don.
Ja Diex ne li face pardon
qui d’eles dira fors que bien
ne de lor cons, por nule rien,
quar il i a molt bon estruit.
Mes maint preudomme en sont destruit.
Honi en sont et confondu,
et lor avoir en ont perdu !
Explicit du con qui fu fez a la besche